ভৰিৰ তলুৱাৰ পৰা যদি ধৰাখন (কণ্ঠ - জয়ন্ত হাজৰিকা)

Play Now

ৰচনা কাল : ১৯৭৭
 
ভৰিৰ তলুৱাৰ পৰা
যদি ধৰাখন
খহি পৰা যেন লাগে
তিল তিল কৈ যদি
নিজৰেই ঘৰখন
কাৰোবাৰ দোষতে ভাগে
পুনৰ গঢ়িবা তুমিহে বান্ধ’ পুনৰ গঢ়িবা তুমি ৷

যদি পৰিয়ালে তোমাক সঙ্গ এৰে
তুমি অকলশৰীয়া হোৱা
যদি সৎ কাম কৰি কৰি
সংসাৰ সজালেও
অপযশ পদে পদে পোৱা
পুনৰ সজাবা তুমি হে বান্ধ’ পুনৰ সজাবা তুমি ৷

শান্তিক কৰি লোৱা তোমাৰ গৃহিণী
ধৈৰ্য্য হ’ব লাগে পিতৃ
দয়া হ’ব লাগে মৰমী ভগিনী..
ক্ষমা হ’ব লাগে ভাতৃ
আশা হ’ব লাগে তোমাৰ সহোদৰ
সংগ্রাম হ’ব গৈ মাতৃ ৷

যদি বিছনাৰ অভাৱত
আকাশৰ তলতে
বাগৰি পৰিব লাগে
যদি পোছাকৰ অভাৱত
সময়ৰ ৰঙকে
মেৰিয়াই ল’বই লাগে
তাকেই কৰিবা তুমি হাঁহিমুখে
তাকেই কৰিবা তুমি।।