আকাশ বিশাল

ৰচনা কাল : ১৯৮৩

আকাশ বিশাল সাগৰ বিশাল
তাতোকৈ বিশাল মাতৃ-হৃদয়
পশু-পক্ষী বা নৰ-নাৰীৰ
মাতৃৰ স্নেহমায়া চিৰ মধুময়।।

মাতৃৰ প্ৰতি ধনী-দুখীয়াৰ
মায়া-মমতা একেটাই
মাথোঁ ভিন্ন ৰূপে স্নেহ প্ৰকাশে
হৈ নিঃস্বাৰ্থ সদায়।।

মাতৃ যদি সন্তানহীনা হয়
জীৱন পূৰ্ণ নহয়
ধৰাৰ স্বৰ্ণহীৰা মণি-মৰকত
মাটিৰ চপৰাহে হয়।।

কোনো সন্তানৰ দৰিদ্ৰ মাতৃয়ে
গোপনে চকুলো সৰায়;
ৰক্ষা কৰাৰ সংগ্ৰামত
কলিজাৰো শোণিত বোৱায়।

যি মাতৃয়ে আপোন সন্তানৰ
কিছু স্বীকৃতি নেপায়
তেনে সন্তানে জীৱন মৰুত
শান্তি সিন্ধু হেৰুৱায়।।